धान रोवणीसाठी लागणारे मजूर, चिखलणी करिता लागणाऱ्या पाण्याची कमतरता,हवामानात झालेला बदल, मान्सूनची अनिश्चितता, भूजल संकटआणि भात उत्पादनाचा वाढता खर्च यामुळे धान शेतीमध्ये शेतकऱ्यांना विविध अडचणींना सामोरे जावे लागत आहे.हे पाहता भातशेतीची पारंपरिक पद्धत – थेट पेरणी पद्धतीचा आपल्याला पुन्हा अवलंब करावा लागेल, तरच भविष्यात आपल्याला पुरेसे धानाचे उत्पादन घेता येईल.म्हणुन डॉ. पंजाबराव देशमुख कृषी विद्यापीठ अंतर्गत कृषी विज्ञान केंद्र साकोली व बायर डायरेक्ट एकर्स यांच्या माध्यमातून साकोली व लाखनी परिसरात मागील दोन दिवसात २० एकर शेतामध्ये विविध पेरणी यंत्राने थेट पेरिव धान लागवड करण्यात आली आहे.
भंडारा जिह्यातील जे शेतकरी पेरिव धान लागवड करू इच्छितात व त्यांच्या कडे अशा यंत्राची उपलब्धता आहे यांची सांगड घालून त्यामधून पेरिव धान लागवड क्षेत्रात वाढ व्हावी याकरिता श्री, योगेश महल्ले विषय विशेषज्ञ (कृषी अभियांत्रिकी ) व श्री. मोहन कापगते (फील्ड ऑफिसरबायर डायरेक्ट एकर्स) यांच्या समन्वयातून आतेगाव, मुंडीपार,उमरझरी,सानगडी या परिसरातील एकूण ०८ शेतकऱ्यांच्या शेतावर मागील दोन दिवसात २० एकर शेतामध्ये विविध पेरणी यंत्राने थेट पेरिव धान लागवड करण्यात आली आहे. या विविध यंत्रामध्ये बायर डायरेक्ट एकर्स यांच्या कडून प्राप्त जगजीत हॅपी सीडर, धान पेरणी यंत्र (राईस ग्रेन प्लांटर) तर शेतकरी पेरणी यंत्र पुरवठादारा मध्ये बहु पिक पेरणी यंत्र, प्लांटरच्या सहाय्याने थेट पेरिव धान लागवड करण्यात येत आहे.
यामध्ये श्री. मिलिंद कापगते, श्री.गिरीधर कापगते, श्री. संजय वाघमारे उमरझरी, श्री. हिरालाल हटवार आतेगाव, श्री विनोद झिंगरे व रामकृष्ण मानवतकर-सानगडी, श्री. एकनाथजी शेंडे –मुंडीपार यांचा समावेश असून शेतकऱ्यांना पेरणी यंत्र पुरवठादार म्हणुन श्री.दिलीप शेंडे (मुंडीपार),श्री. दिलीप गहाने (सिरेगावबांध)व श्री. विवेक परशुरामकर (साकोली) यांनी सहकार्य केले.
यावर्षी भंडारा जिल्ह्यात अधिक क्षेत्र थेट पेरिव धान लागवड तंत्रज्ञानाने पेरणी व्हावी यासाठी बायर डायरेक्ट एकरचे श्री. संजय सिंह (मार्केट डेवलपमेंट अग्रोनोमिस्ट), श्री. महेन्द्र जामुनपाणे (क्लस्टर इंचार्ज), हे प्रयत्नशील आहे. तर थेट पेरिव धान लागवड तंत्रज्ञानमध्ये विविध पेरणी यंत्राचा वापर वाढवा असे आव्हान डॉ. उषा डोंगरवार वरिष्ठ शास्त्रज्ञ व प्रमुख यांनी शेतकऱ्यांना केले आहे.
